تقريبا قاعدة كبيرة من الناس بتعاني علشان تقدر تلاقي مكان تركن فيه عربيتها خاصة مع الزحمة الكبيرة في القاهرة الكبرى الزحمة دي بتخلي الناس تفضل تلف لحد ما تلاقي مكان تركن فيه عربيتها واحيانا المكان ده بيكون بعيد شوية عن المكان اللي هي رايحاله،  وده بيخليهم ينسوا احيانا هما ركنوا فين!

 بس في طريقة سهلة ممكن تحدد بيها مكان عربيتك باستخدام خرائط جوجل سواء لو معاك موبايل بنظام أندرويد أو IOS. بص يا سيدي الموضوع بسيط .. اعمل بس معانا الخطوات دي.. أو افتكر تعملها وقت ما تركن.

 تقدر من خلال خرائط جوجل انك احفظ مكان وقوف عربيتك وممكن كمان تفعل ميزة الاشعارات لبيانات وقوف عربيتك وده من خلال الخطوات دي

 1- اول ما تلاقي المكان المناسب علشان تركن عربيتك..على طول افتح خرائط جوجل على موبايلك وابحث عن موقعك الحالي "النقطة الزرقاء" 

2- دوس على النقطة الزرقاء ومن قائمة خيارات الموقع اختار "حفظ موقع وقوف سيارتك - save your parking". بعد ما تعمل عملية الحفظ دي هتلاقي دبوس اتحط على الخريطة في موقعك الحالي، واتحطت علامة عليه كدة كأنها مكان وقوف.

 3- اتأكد ان الدبوس اتحط في مكان ركن عربيتك .

 4- بعد ما تخلص مشوارك افتح خرائط جوجل على موبايلك وخش على خانة البحث، واضغط على خيار "مكان الوقوف - parking location"، وبعدين دوس على "الاتجاهات - Directions" علشان تحدد مكان وقوف عربيتك بسرعة وسهولة.

 وخليك بقى مع الـ GPS هيقولك خش يمين وخش شمال لحد ما يوديك لحد عربيتك. 

الموضوع من /تيك_ريفيو